ને કથા આરંભ થઇ

પ્રશ્ન સામે પ્રશ્ન મૂક્યો ‘ને કથા આરંભ થઇ
અર્થ, ફણગા જેમ ફૂટ્યો ‘ને કથા આરંભ થઇ

બંધ ઘરની ભીંત જેવો એક માણસ, આખરે
દ્વાર ખૂલે એમ ખૂલ્યો ‘ને કથા આરંભ થઇ

કાંકરીચાળો કરી ગઈ એક વીતી ક્ષણ, પછી
સંસ્મરણનો કાચ તૂટ્યો ‘ને કથા આરંભ થઇ

રાતઆખી ચાંદની પીધા પછીનો કેફ લઇ
સૂર્ય સાંગોપાંગ ઉગ્યો ‘ને કથા આરંભ થઇ

થઈ નિમાણાં કંટકોએ, પુષ્પને નતમસ્તકે
લાગણીનોં અર્થ પૂછ્યો ‘ને કથા આરંભ થઇ

રોજ ખાંપો આવતો ગ્યો લાગણીનાં પોત પર
એકધારો સ્નેહ ખૂટ્યો ‘ને કથા આરંભ થઇ

કોઇ ટોળામાં ભળ્યું, તો કોઇમાં ટોળું ભળ્યુંછેવટે,
માણસ વછૂટ્યો ‘ને કથા આરંભ થઇ !

છંદવિધાનઃ
રમલ ૨૬ગાલગાગા ગાલગાગા ગાલગાગા ગાલગા

ડૉ.મહેશ રાવલ