સંબંધની ખાતાવહી

કે’વાય ઘર, પણ ઘર નથી બસ એટલું
દિવસો જ છે, અવસર નથી બસ એટલું

ઈચ્છા અપેક્ષા લાગણી સંબંધ ખુદ
શેનું ય કંઇ વળતર નથી,બસ એટલું

છે આમ તો જાહોજલાલી બહુ
છતાંમાણસપણું સધ્ધર નથી,બસ એટલું !

શું ખોલવી ખાતાવહી સંબંધની ?
એમાં કશું સરભર નથી,બસ એટલું

મુશ્કેલ છે મળવું કશા કારણવગર
‘ને કારણો પગભર નથી,બસ એટલું !

વકરી રહ્યો છે સ્વાર્થનો લૂણો બધે
ભીંતો હવે નક્કર નથી,બસ એટલું

છે સામ્ય કેવળ એટલું અહીં સર્વમાં
મન કોઇનાં મનહર નથી,બસ એટલું !

છંદવિધાનઃગાગાલગા ગાગાલગા ગાગાલગા
ડૉ.મહેશ રાવલ